Շարունակեք Ձեր հայրապետական առաքելությունը՝ ի զորություն մեր Սուրբ Եկեղեցու․ Սամվել Կարապետյան
«Ուժեղ Հայաստան» կուսակցության ղեկավար Սամվել Կարապետյանը շնորհավորել է Ամենայն Հայոց Կաթողիկոսի գահակալության 27-րդ տարեդարձի առթիվ․
«Վեհափա՛ռ Տեր,
Շնորհավորում եմ Ձեզ օծման և գահակալության 27-րդ տարեդարձի առթիվ։
Մեր ազգի հազարամյա ողջ պատմության ընթացքում եղել է Ամենայն Հայոց Հայրապետի օծման ընդամենը 132 իրադարձություն։ Առաջին Հայրապետի՝ Սուրբ Գրիգոր Լուսավորչի օծումից մինչև Ձեր օծումը ձգվում է մեր ազգի հոգևոր շարունակականության անխզելի շղթան՝ իր 132 օղակներով։ Այդ շղթան ոսկե թելի պես անցնում է հայ ազգի ու մեր Հայրենիքի պատմության միջով՝ սերունդներին փոխանցելով մեր հավատքն ու ինքնությունը։
Մաղթում եմ Ձեզ քաջառողջություն, արևշատություն և անսասան կորով՝ շարունակելու Ձեր հայրապետական առաքելությունը՝ ի զորություն մեր Սուրբ Եկեղեցու, ի միաբանություն մեր ժողովրդի և ի բարօրություն Հայրենիքի։
Թող Տերը պահապան ու զորավիգ լինի Ձեզ, իսկ Ձեր հայրապետական գավազանը՝ միշտ ծաղկյալ։
Որդիական խոնարհումով՝
Սամվել Կարապետյան»։
Աղբյուր՝ AntiFake.am
