Օվերչուկն ու Մոնղոլիայի փոխվարչապետը քննարկել են ԵԱՏՄ–Մոնղոլիա առևտրային համագործակցությունը
Ռուսաստանի փոխվարչապետ Ալեքսեյ Օվերչուկը հանդիպել է Մոնղոլիայի առաջին փոխվարչապետ, էկոնոմիկայի և զարգացման նախարար Ժադամբինի Էնխբայարի հետ։
Կողմերը քննարկել են Եվրասիայում տրանսպորտային կապերի ամրապնդման, ինչպես նաև էներգետիկայի, արդյունաբերության և ագրոարդյունաբերական համալիրի ոլորտներում Ռուսաստանի և Մոնղոլիայի համագործակցության զարգացման հարցերը։
Առանձնահատուկ ուշադրություն է դարձվել Եվրասիական տնտեսական միության անդամ պետությունների և Մոնղոլիայի միջև ժամանակավոր առևտրային համաձայնագրի իրականացման ուղղությամբ համատեղ աշխատանքին։
«Մենք շահագրգռված ենք սերտ համագործակցությամբ՝ համաձայնագրի առավելությունների գործնական իրացումն ապահովելու, ինչպես նաև առևտրի, ներդրումների և միջտարածաշրջանային համագործակցության ոլորտներում փոխգործակցությունն ընդլայնելու նպատակով»,- ընդգծել է Մոնղոլիայի առաջին փոխվարչապետ, էկոնոմիկայի և զարգացման նախարար Ժ. Էնխբայարը։
Բանակցությունների արդյունքներով Ալեքսեյ Օվերչուկն ու Ժադամբին Էնխբայարը նշել են Եվրասիայում տրանսպորտային կապերի ամրապնդման ուղղությամբ Ռուսաստանի և Մոնղոլիայի համատեղ աշխատանքի ռազմավարական նշանակությունը, այդ թվում՝ Ռուսաստան–Մոնղոլիա–Չինաստան տնտեսական միջանցքի զարգացման գործում։
Կողմերը պայմանավորվել են երկու երկրների կառավարությունների մակարդակով շարունակել երկկողմ և ԵԱՏՄ ձևաչափերով համագործակցության բոլոր առանցքային հարցերի համատեղ մշակումը՝ Ռուսաստանի և Մոնղոլիայի շուկաներ ապրանք արտադրողների փոխադարձ հասանելիության լավագույն պայմաններն ապահովելու, ազատ առևտրի ներուժն ամբողջությամբ իրացնելու և երկու երկրների միջև առևտրային հաշվեկշիռը բարելավելու նպատակով։
