«Քաղաքացիական պայմանագիր» կուսակցության` Գավառում անցկացվող հանրահավաքի ընթացքում Գեղարքունիքի մարզպետ Գնել Սանոսյանն ասել է, որ 3 տարի շարունակ մարզը ստացել է ամենամեծ ֆինանսավորումն ու դիմելով հավաքված քաղաքացիներին` հայտարարել. «նաև մեր քվեով պետք է ինձ երեսատեղ թողնեք, որ չորրորդ տարվա համար շատ գումար ուզեմ»:
Գնել Սանոսյանը, օգտագործելով իր պաշտոնեական դիրքը, նախընտրական խոստում հանդիսացող հայտարարություն է անում` անուղղակիորեն խոստանալով, որ իր քաղաքական ուժին՝ «Քաղաքացիական պայմանագիր» կուսակցությանն ընտրելու դեպքում Գեղարքունիքի մարզը կշարունակի մեծ ֆինանսավորում ստանալ։ Հայտարարության մեջ նաև առկա է, այսպես ասած, զգուշացում գավառցիներին, որ եթե շատ քվեներ չտան «ՔՊ»–ին, ապա մարզպետը «երես չի ունենա» մարզային կարիքների համար ֆինանսավորում ուզել Կառավարությունից։
Հետաքրքիր է՝ արդյո՞ք գործող մարզպետն ինքը «շատ քվե՝ շատ ֆինանսավորում, քիչ քվե՝ քիչ ֆինանսավորում» սկզբունքով նախազգուշացում է ստացել Փաշինյանից։
Աղբյուր՝ AntiFake.am